Nandre Black Jack’s, na tsy niondana Black Jack’s aza. Telopolo sa efapolo taona aty aoriana anefa toa mahatadidy ho azy, ireo hira nandalo ny sofina. Tsy ny nalaza indrindra tamin’ireo indray nihira, saingy mahagaga fa misy telo na efatra tsaroana avy hatrany, na ny feony na ny tonony. Angamba noho ny maha tononkira azy, vao noravahana feony ?
Tsy mahazatra firy intsony ankehitriny, mba tsy ilazana hoe tsy hay intsony ankehitriny, ireny hira manankambara ireny fa tsy dia hoe rima iray na roa no averimberina mandra-pahatapitry ny fandihizana. Fandihy rahateo ve ny hiran-dry Black Jack’s, ankoatra ireo ankizy nandihy rock nandritra ilay concert efa antitra, hita amin’ny vidéo efa tranainy...
Na noho ny fanajana ny teny ihany aza, mendrika veloma farany Randriamiarana Jean de la Croix «Delacre», izay nodimandry teo amin’ny faha-72 taonany.
Mba tandremo kely leitsy
Mba tandremo kely leitsy
Ity fiainana ity anie ka be fikafika
Voadona ialahy raha tsy mahay miampita
Ny fandrika iaraha-mahita
Zaran’olona aza ialahy midaraboka, any dia tsy hita
Zandry a, ny tany anie ka malama maina
Tsy ampy leitsy ny mitaraina
Mba tanora miary sao rehefa drodroka tsy manana hataina
Sao ny namana niarahana ela tafita, ialahy tonga saina
Asa ianao raha ohatra ahy
Asa ianao raha hino ahy
Asa ianao raha homba ahy
Tsy haiko ianao raha ohatra ahy
Fa ny fahoriako sy ny fijaliako dia ezahiko ho zakaina irery
Ny hasambarankeliko eto an-tany dia koloiko tsy ho verivery
Fa maro ireo mizaka fahoriana folo avo heny noho ianao
Kanefa tsy misoka-bava kely akory izy ireo na mitalaho
Tsy hitakiky aminao, tsy handady
Fa raha mbola misy fofon’aina hampijoro, dia aleony mitady
Sao dia ny aoriana no tsy zaka
Raha ny havana ilampiana no indreo mandatsa
Tsy aleo tsisy romoromo tamin-dravimbomanga kely sy patsa
Toy izay any amin’ny havana hanim-pitoloha fa arahin-datsa
Tsarovy ihany leitsy izay valimbabena
Mahaiza manome fa nomena
Indray mandeha dia indray mandaha ihany anie ry zandry
No andalovana eto ambonin’ny tany,
Ialahy no hitsara, tsy ho ratsy fiafara
Ny harena azo rehefa ikimpiana anie ry zandry
Fa ny fahendrena tsy mba vidiana
Koa faramparano
Tsy hidiran’angano
Ny na ny dika-teny nataony tamin’ny «Puisque tu pars» an’i Jean-Jacques Goldman aza, misy ventiny tena teny gasy fa tsy ara-bakiteny fotsiny :
Indro tò ankehitriny
Ilay resako fahiny
Fony ianao mbola notrotroiko
F’isan-janako tsy foiko
Hoe hisy andro iray
Izay handaozanao anay
Ny hany sisa hafatray
Raha mba misy ny andro iray
Mahatsiaro ianao fa honena
Very fanantenana
Miverena !
Izao fotoana kely izao
No sisa anananay anao
Ka manahy no sady faly
Raha mahatsiaro ny andro omaly
Tso-drano iray
No atolotray
Hahita hatrany
Ny soa sy mamy
Fananankambara mazàna no miteraka aingam-panahy. Ny an’i Delacre dia ireto notanisainy ireto ny anton’ny hirany :
Hihira ny hafaliana aho, hanjakany eto an-tany
Hihira fijaliana aho, fa iainana izany
Hihira ny hazavana aho, hisiany eto an-tany
Hihira ny hadalana aho, fa fiainana izany
Hihira fahendrena aho, hanjakany eto an-tany
Hihira ny hafetsena aho, fa fiainana izany
Hihira ny omaly aho, hampety ny androany
Hihira ny ho avy faly aho, fa ilaina izany
Raha mbola misy fofon’aina kely ijoroako
Raha mbola misy fo tia iray izay mitoloko
Raha mbola misy zazakely iray izay maty noana
Hirako izay, hirako foana
Raha mbola misy, masoandro iray izay manafana
Raha mbola misy, bôfibôfy iray izay mbola mitana
Raha mbola misy, zara vilana eo mandavantaona
Hirako izay, hirako foana
Raha mbola misy, mafy ady iray mba manantena
Raha mbola misy, ireo minia manao tsindry hazolena
Raha mbola misy, rà latsaka eo tsy ahoan-tsy ahoana
Hirako izay, hirako foana
Raha mbola eto an-tany aho dia hirako izany
Nasolo-Valiavo Andriamihaja